నేటి చర్చ : జగిత్యాల జిల్లా కేంద్రంలో, మహిషాసురుడి చేతిలో కాక్రోచ్ తో వినూత్న నిరసన.

మహిషాసురుడి చేతిలో కాక్రోచ్ .

జగిత్యాల జమ్మిగద్దెపై వ్యంగ్యాస్త్రం!_

చర్చ, జగిత్యాల:_ మహిషాసుర దహనం.. చెడుపై మంచి సాధించిన విజయానికి ప్రతీక. కానీ జగిత్యాల జిల్లా కేంద్రంలోని చారిత్రాత్మక జమ్మిగద్దె వద్ద జరిగిన మహిషాసుర దహన కార్యక్రమంలో ఓ వినూత్న ప్రదర్శన అందరి దృష్టిని ఆకర్షించింది. మహిషాసురుడి చేతిలో బొద్దింకను ఉంచి ప్రదర్శించిన కనకదుర్గ సేవా సమితి, “బొద్దింకల వంటి వ్యక్తులను నమ్మకండి” అంటూ వ్యంగ్య సందేశాన్ని వినిపించింది.

విజయదశమి వేడుకల్లో భాగంగా నిర్వహించిన ఈ ప్రదర్శన పండుగ సందడిలో ప్రత్యేక ఆకర్షణగా నిలిచింది. సాధారణంగా రావణాసుర, మహిషాసుర దహనాలతో చెడుపై మంచి విజయాన్ని చాటిచెప్పే వేడుకల్లో.. ఈసారి బొద్దింకను ప్రతీకగా ఉపయోగించడం చర్చనీయాంశమైంది.

దేశవ్యాప్తంగా ‘కాక్రోజ్ జనతా పార్టీ’ పేరుతో జరుగుతున్న నిరసన కార్యక్రమాల నేపథ్యంలో ఈ ప్రదర్శనకు మరింత ప్రాధాన్యత ఏర్పడింది. బొద్దింకను చేతిలో ఉంచిన మహిషాసురుడి రూపం ద్వారా సమితి ఎవరిని ఉద్దేశించి ఈ సందేశాన్ని ఇచ్చిందన్న ఆసక్తి స్థానికంగా వ్యక్తమైంది.

పండుగ వేడుకలకే పరిమితం కాకుండా, ప్రతీకాత్మక ప్రదర్శనతో సమాజానికి ఓ సందేశాన్ని అందించే ప్రయత్నం చేయడం విశేషం. జమ్మిగద్దె వద్ద జరిగిన ఈ వినూత్న ప్రదర్శన విజయదశమి వేడుకల్లో ప్రత్యేక చర్చకు తెరలేపింది.